JA RI’ ACHI KE’ NUQ’AJUJ, NUB’IJ CHUQA NUB’ÄN RI CHOLQ’IJ
Chi kijujunal ri taq ri q'ij chin ri q'ij Cholq’ijnikinut rucholajem ri kik’aslem, ri kina’oj ri Mayab’ winäq. Pa kina’oj ri Mayab’ ri Cholq’ij nutijonïk chij ri ramaj, rik’ojlib’äl ri silonïk chij ri ch’umilal. Ruma’ ri cholq'ij nïm retamaxïk, rub’anb’äl, runa’oj pa ronojel nuk’ut nich’on chij ri winaqi’ Mayab’. Ri winaqi’ Mayab’ xkina’ojij jun samajb’äl chin ri ramaj, k’ojlib’äl chuqa silonïk chin rikaj, chin ta ke ri’ nuya’ ru cholajen, rub’eyal ri kik’aslem ri winaqi’ chuqa runitit kik’aslen ri winaqi’ k’in ri qate’ ruwach’ulew.
Jun ruche’el ri nkikanuj pa maya’ na’oj, ja ri kikotemal, ri junan rub’eyal tukanuj, tukusaj ri winäq uk’ayon uchuq’ab’il. Ja ri’ ajq’ij nukusaj jalajoj taq ch’ab’el, taq na’oj chin nuto’ ri winäq chin niri’l rub’eyal rucholajen chuqa run’aj chin ruk’aslen chuqa k’in kik’aslen ri jun chik taq winäq.
Ri ja ri’ achi ke’ nuq’ajuj ri jujun q’ij chij ri Cholq’ij, xkitijosex chin ri winaqi’ nikil ri rub’eyal ri qate’ kaj chuqan ri ramaj taq noq ri aq’a chuqa ri ramaj taq noq riq’ij chuqa kik’aslem ch’akul, xamanil chuqa ri niqawaqaxajqi’.
Ri xseqer pe nitikir pa wo’o’ ramaj chin nimaq’a, taq nitzum pe ri saqil. To ri aq’a nik’is ri wo’o’ ramaj ri nimaq’a. Par i wo’o’ ramaj chi nimaq’a pa taq ri waqi’ ramaj ri tiqaq’ij ja ri’ ri oxlajuj ruramaj ri saqil, ja re’ kiramaj ri ek’es. pa ruwi’ ri ulew. Chupan ri ramaj ri’ tikirel nunibb’än rusamaj ri achi’. Taq nitikir ri wuqu’ ramaj che ri toq’a k’a ri kaji’ ramaj che ri nimaq’a, ja ri’ ri julajujkichin ri qatit qamama’ ri xekem yan. Po ri aq’a po ri rimaj chin ri q’equ’, xax’e kan okel kitirel nak’utuj kichajixïk ri qatit qamama’ ekaminäq chik chin ke ri’ manäq nuk’owisaj jun etzelal ri winäq. K’in re’ nikikanuj ri rub’eyal rucholajem ri k’aslem pa ruslanïk ri winäq, ri chikopi’, ri taq q’ayïs taq che’ chuqa ri ronojel ri k’o kik’aslem chupan ri qate’ ruwachulew. Ruma’ ri achi ke’ ruq’ajaren ri jujun q’ij, k’o jun rub’ixik rusamaj. Ja k’a ri’ nirajo’ nub’ij ri rusik’iwuj Cholq’ij (Tichoc C. 2018: 221- 222). Ruk’ux ri jujun q’ij kik’wan ri’ k’in rib’anobäl ri winaqi’, ja ri’ chupan ri nikiyuq’uj ri tinamït, chupan ri ajb’anoy pwäq. Chuqa ruk’walon ri k’in rinib’anatäj ruma’ ri ch’a’oj nub’än ri ulew ruma’ man qachajinta ütz ri ruwach’ulew ronojel ri nunataj nipa’e’ chij ruk’aslem ri achi’. Chuqa ruk’wan ri k’in ri surunïk ri juley taq ruwach’ulew, ri jalajoj taq ruwäch ri ik’.
Ronojel ruwäch ri ch’akul chij ri rub’eyal ri jujun taq q’ij. Po ruma’ ri ja re’ nikikusax chin nikich’ob’ ütz ri jalajoj taq tzij chij ri raxnaqil, ri ützuläj q’utum.
Ru tzijol ri rusik’iwuj ri tat Tichoc chi ri ajq’ija’, ruma’ rije’ k’o kina’oj chin niki ch’ob’ ri naj’oj petenäq chupan ri sik’iwuj. Po jalajoj taq winäq ütz nikikusaj po tikirel nikik’uj to’onïk che winaqi’ k’o ketamab’äl chin ke ri’ manäq nikisech rub’eyal ri na’oj k’o pa sik’iwuj.
Pa jun ch'uti peraj che risik’iwuj Cholq’ij, Rosalino Tichoc Cumés.