Afrikaans: Die geelpootpapegaaiduif (Treron phoenicoptera) is 'n algemene papegaaiduifspesie in die Indiese subkontinent. Dit is die staatsvoël van Maharashtra, en word in Marathi hariyal genoem. Soos ander papegaaiduiwe voed die spesie kommunaal op vrugte, insluitend verskeie wildevyspesies. In die vroeë oggendure word hulle dikwels gesien waar hulle die eerste sonstrale vang in oop boomkruine wat bo die ruie blaredak uitsteek. Paartjies word veral saam in die krone opgemerk. Hierdie papegaaiduif—benewens talle ander voëlspesies van die substreek—is uitsluitlik boomlewend en kom selde, indien ooit, af grond toe. Hulle gee voorkeur aan oop maar genoegsaam beboste landskappe sowel as woude, en word gereeld in die omgewing van dorpe en nedersettings aangetref, en sal selfs tuine besoek. Die voëls klouter behendig met die takkies van vrugtedraende bome langs, en klou gereeld onderstebo aan takkies om een of ander vy of bessie te bereik. Hulle hou in swerms van 10 tot 50 voëls, en versamel soms in enorme getalle op banjan- of peepalbome om in die teenwoordigheid van mainas, neushorings, tiptolle en ander vrugtevreters die ryp vye te verslind. Wanneer 'n boom betrek word, raak die duiwe onopsigtelik. Ten spyte van hul grootte word die hele duiweskaar onsigbaar, tensy 'n onbedoelde beweging hier of daar hul teenwoordigheid verraai. Verbasende getalle vladder uit 'n boom as 'n geweer afgevuur word. Wanneer hulle so versteur word, sal die swerm vir 'n wyle in 'n ander boom in die nabye vertoef, net om terug te keer na die fees sodra hul vrees besweer is. Twee of drie saam sal terugkeer totdat die blare weer 'n roerende massa duiwe is wat gretig opmaak vir verlore tyd. Die voëls spandeer die dag om hul rondtes van een na die ander vrugteboom te voltooi, en rus met tussenposes op die boonste takke van 'n droë of blaarlose boom. Hulle kos bestaan ​​geheel en al uit vrugte en bessies—grootliks wildevye—maar knope en lote word ook gevreet. Hulle het aangename, sagte en strelende fluitroepe wat gewoonlik die eerste aanduiding van hul teenwoordigheid in 'n omgewing gee. Die vlug is raserig, vinnig, sterk en regstreeks." "Oorwegend van Maart tot Junie word die skraal nes, soos die van ander duifsoorte, gebou. Dit word in bome van matige grootte geplaas, versteek in die loof. Soms broei etlike pare gelyketyd. Twee glansende wit eiers word gelê en albei geslagte onderneem die huishoudelike pligte.